近年愈來愈多人玩露營，其實放假去下郊外呼吸新鮮空氣真係一個唔錯嘅選擇。今次就推介幾個新人營地畀你哋，快啲Mark低佢啦✏
粉嶺：鶴藪營地
原來北區都有營地嫁，鶴藪營地環境清幽，而且設備齊全，洗手間仲設有淋浴設備，好適合露營新手，附近就係鶴藪水塘，大家可以喺旁邊散步打卡！
營位類型：中型
設施：洗手間、浴室、水喉、燒烤爐、檯、櫈及晾衫架
交通：粉嶺港鐵站乘坐52B 號往鶴藪專線小巴，於鶴藪村總站下車。沿鶴藪道往鶴藪水塘前行，步行約15分鐘。
Photo source: Yahoo
西貢：黃石營地
黃石營地位於黃石碼頭附近，位置非常方便，而且背山面海，景色非常靚！營地旁邊仲有黃石燒烤場，啱哂想邊露營邊燒烤嘅人，鐘意釣魚嘅朋友仲可以去營地對出嘅碼頭釣下魚消磨時間～
營位類型：小型
設施：洗手間、涼亭、水喉、燒烤爐、檯及櫈
交通：西貢市巴士總站乘94號或假日及公眾假期由鑽石山巴士總站乘96R 號往黃石碼頭巴士，總站下車。下車後沿巴士站旁跟隨指示牌上行，步行約5分鐘。
Photo Source: kelvintknlife.blogspot
荃灣：扶輪公園營地
營地旁邊有免費停車場，對於駕車人士非常方便～落車之後行1分鐘就可以到達營地，附近仲有燒烤場同埋大帽山扶輪家樂徑、荃錦自然教育徑，非常適合一家大細嚟玩呀！
營位類型：小型
設施：洗手間、水喉、燒烤爐、檯、櫈及污水穴
交通：荃灣如心廣場或荃灣港鐵站上蓋乘搭51號巴士，在大帽山郊野公園下車後步行約5分鐘。
Photo Source: kelvintknlife.blogspot
*郊野公園嘅所有燒烤地點及露營地點會因應疫情最新情況而關閉，大家出發前一定要再次確認開放情況。另外，記得要注意個人同埋環境衞生，唔好破壞我哋嘅大自然呀*